Merantau

Karatau madang di hulu

Babuah babungo balun

Marantau bujang dahulu

Di kampuang baguno balun

Dimulai jo filosofi ikolah kito mengenal istilah “Marantau”. Orang Minang memang identik dengan kata MERANTAU. Ya, Meninggalkan kampung halaman untuk sementara waktu atau lebih lama, atau bahkan untuk selamanya. Sabuah tradisi nan candaruang kapado urbanisasi bagi mayoritas masyarakat dunia, ndak terkecuali bagi masyarakat Jorong Sungai Salak, Nagari Koto Tangah, Batusangka. Persoalan mato pencaharian dan pendidikan manjadi alasan utamo sebagian masyarakat Sungai Salak menuju berbagai penjuru kota dan negara nan dianggap menjanjikan untuak peningkatan taraf kesejahteraan iduik. Sabagian di antaronyo, untuak menuntuik ilmu, sabagian nan lain bakarajo di berbagi sektor usaho, baiak di pemerintahan, maupun swasta atau berwiraswasta. Di antaro alasan marantau di ateh, ndak banyak Urang Rantau nan kambali pulang untuak membangun kampuang halaman.

Ado nan acok pulang dengan alasan karano keluarganyo di kampuang atau sebagian saudaranyo di kampuang masih banyak. Ado pulo nan lain pulang untuak mengurus harato nan ditinggakan, ado juo nan pulang katiko hari rayo sajo, pun ado juo nan  pulang katiko urang tuo atau sanak  keluarganyo nan sakik atau alah mandahuluinyo ka dalam Liang Lahaik, dan bahkan ado nan ndak pernah pulang samo sakali samanjak kabarangkatannyo nan partamo dari kampuang. Sajalan jo masalah iko, kabanyakan warga Sungai Salak alah manatap dan menjadi warga tampek parantauannyo sampai turun tamurun. Sehinggo pernah dijumpai sabuah kenyataan menggelitik dan kadang taraso memilukan, jangankan untuak bisa diajak bahaso daerah asanyo, dimano latak Sungai Salak pun sabananyo beliau  indak pernah tahu.

Pernah Ambo danga carito Urang Rantau tantang penolakan mereka untuak pulang kampuang: “Untuk apa pulang ke Sungai Salak?, di sini kita sudah terbiasa dengan fasilitas serba ada, kalau di Sungai Salak, ini dan itu tidak ada”, katanya. Dan nan labiah indak lamaknyo, ketiko seorang tapandang (baco: berpendidikan) mangatokan: “Apa sih yang mau dibanggakan dengan kampung? Orangnya dekil, jorok, dan udik” katanya. Sungguah membuek hati Ambo miris. Barangkali memang karano Ambo  Urang Kampuang.

Barado di parantauan, tarutamo di kota-kota gadang di pelbagai panjuru nagari, bahkan di lua nagari, tantu sajo memiliki kualitas iduik dan tingkat kesejahteraan nan jauah labiah elok dibandiangkan jo  sanak sudaro kito nan tingga manghuni kampuang halaman kelahiran. Manatap iduik di rantau dengan fasilitas nan serba instan, dan kehidupan nan mamadai, tantu sangaik menggiurkan. Tapi alangkah labiah eloknyo pulo kalau Urang Rantau nan alah mandapek kapandaian dan kamapanan nan balabiah tu, saketek banyaknyo disumbangkan pulo untuak mambangun kampuang kito. Indak pun materi, pemikiran pun jadi. Sahinggo bisa basamo-samo kito “MAMBANGKIK BATANG TARANDAM” sarupo pituah Urang Tuo-tuo Kampuang kito.

Urang Rantau, caliak juolah kampuang kito, sapiriang, jo duo piriang sawah nan manguniang alah maimbau-imbau pulang untuak sakadar bacurito. Sakadar mangopi basamo di palanta lapau, bagarah, bakucindan saadonyo. Paliang indak sakadar “BERNOSTALGIA” bahaso urang kininyo.

Tanpa saketek pun memungkiri jaso elok pemuka-pemuka kito nan bajaso membangun kampuang dari hasil jariah payah di rantau dan kepintaran dari majunyo pendidikan di rantau urang, tantu kito ingin tetap manjalin komunikasi nan elok dan berkesinambungan antaro Kampuang jo Rantau. Oleh karano itu Komunitas Facebook Warga Sungai Salak kito iko marupakan salah satu  langkah nan kito rintis untuak merealisasikannyo. Jadi, kami mangimbau Dunsanak-dunsanak, Uda-Uni, Mamak-Kamanakan, Kakak-adiak supayo bisa menjadikan grup kito iko sabagai panyambuang tangan untuak saliang mambantu dan panyambuang lidah untuak saliang maingek’an dalam mengeratkan hubungan kekeluargaan kito di mano pun kito barado.

Alah samo-smo kito katahui bahwasanyo masyarakat Minang di Perantauan, salamo iko sangaik tanamo dengan ikatan persaudaraan di tampek parantauannyo. Sehinggo lahirlah berbagai organisasi nan punyo kekuatan tersendiri untuak saling berkontribusi mambela saudaranyo nan terjebak kesulitan. Mako, diharapkan sarupo itu pulolah kito hendaknyo mambangun persaudaraan kito sabagai Dunsanak Sakampuang. Akhir kato, semoga sajo tujuan tulisan ko bisa tacapai, dan makmur-sentausa juo lah kampuang Sungai Salak kito. Amin, Yaa Rabbalalamin.

.